IV XORNADAS DA MERLUZA

O alcalde de Burela, Alfredo Llano, o presidente de Absa, Abelardo Basanta, e a concelleira do Mar, Remedios López, presentaron hoxe a cuarta edición das xornadas gastronómicas da merluza do pincho que se desenvolverán do 27 ao 29 de maio.

López Villar explicou que “o que intentamos é facer, como en anos anteriores, unha ruta de tapeo polo pobo, facéndoa coincidir co primeiro fin de semana das festas patronais de Burela. Deste xeito os días 27, 28 e 29 de maio váise promocionar Burela, non só o fermoso pobo pesqueiro que temos senón tamén a súa pesca, inculcando, unha vez mais, os hábitos tan saudables do consumo do peixe na cidadanía”. A edil socialista lembra que “dentro da campaña de promoción desta especie o Concello participou na última edición do encontro de palilleiras axudando economicamente a promocionar a empanada de merluza do pincho de Burela e agasallando a mais de 400 palilleiras de Galicia e Asturias cun exemplar do libro gastronómico referido a esta especie”.

Nesta ocasión participan 18 hoteleiros : Parrillada de Jandro, Mesón do Poeta, La Bodeguilla, Os Remos, Miranda, Palacio de Cristal, Hamilton, A Marquesa, O Raio, Lucer, Hotel Galatea, Hotel Nordés, restaurante O Portelo, bar da Costa, A Lonxa, Mesón da Pedra, La sartén de Carmen e cervexería Kiko. O prezo da ración, acordado cos hosteleiros nunha xuntanza celebrada hai día, será de 6 euros, “o mesmo que en anos anteriores”.

Remedios López dixo que “na primeira edición destas xornadas, en maio do 2008, eran 12 os restaurantes participantes. Intentamos abrir así un abanico de posibilidades para captar novos empresarios e que todos os sectores implicados nesta festa aporten o seu grao de area, contribuíndo a mellorar e potenciar este evento”. Dende Absa, Abelardo Basanta, ve moi positiva esta iniciativa de promocionar os seus produtos e vai agasallar como fixo en anos anteriores, cunha merluza do pincho a cada restaurante que participe nesta festa gastronómica. O Concello pola súa parte faráse cargo, como organizador das xornadas, da publicidade en prensa e radio e tamén da cartelería sen coste algún para o sector hostaleiro. A concelleira do Mar asegurou que “o que pretendemos é que Burela sexa un sitio atractivo e pintoresco para vivir e coñecido pola súa pesca de grande calidade onde o turista poderá disfrutar da gastronomía saudable e apoiar ao noso tecido produtivo”.